Mizotawng Bible Topical Concordence

 He lehkhabu hi, hmangaihna dai lova min enkawltu kan nu leh pate  hriat reng nan kan hlan e.

 LALZUILIANA – 1926– 21(Monday)  January 1991

                 

LIANI 1936 –25(Tues day) December 2007

                                                An tu leh fa te.

1.                                                                                             BIBLE ( PATHIAN THU ) :

                Pathian Thu -

* Pathian chu a thu ah a awm -  Atirin Thu a awm, Thu chu Pathian hnenah a awm, Thu chu Pathian a ni. (Johana1;1)   

* Bible(Pathian Thu)  hi Pathian thawk khum a ni - Pathian Lehkha Thu zawng zawng hi Pathian thawk khuma pek ani a, zirtir kawngah te, thiam loh chantir kawngah te, felna zirtir kawngah te a sawt bawk ani. (2 Tim 3:16)

* Bible (Pathian Thu) hi Pathianin a mi te hnena a sawi ngei a ni – Lalpa thlarau chuan keimah mi hmangin a sawi a : A thu chu ka leiah a awm a. (2Samuel 23:2)

> Thu hrilh lawk reng reng hi mihring thua chhuak a ni ngai si lo a, Thlarau Thianghlim tirhin Pathian hnen ata an sawi zawk thin a ni. (2Petera 1:21)

 BIBLE kan chhiar a, a zirtirnate kan zawm a tul -

                                                                             

                   a) Nunna a tan.

* Nimahsela ani chuan, “Mihring hi chhang chauhvin an nung lo vang a, Pathian kaa thu tin chhuakin an nung zawk ang, tih ziak a ni,” a ti a. (Mathaia 4:4 / Deuteronomy 8:3)

*Pathian Lehkha (Thu) in chhiar ngun thin, a chhungah chatuan nunna awmin in rin avangin: chung Lehkha chu ka

chanchin hriattirtu chu a ni si a. Nimahsela nunna nei turin ka hnenah in lo kal duh si lo.(Johana 5:39f)

*Pathian thu hi a nung a, thil a ti thei a, khandaih hriam tawn eng ang ai pawhin a hriam a, nunna leh thlarau ruh tuah leh  thling phel hrang  khawp hial in a chhun thei a, thinlunga ngaihtuah leh tumte hi a hre nghal thei a ni.(Hebrai 4:12)

b) Thlarau thanlen nan.

* Tin, heng thu , vawiina ka pek che u hi in thinlungah a cham reng ang a, in fate thahnemngai takin in zirtir ang a, in ina in thut lai te, kawnga in kal lai te, in mut lai te, in thawh hun tein in sawi thin tur a ni.(Deuteronomy 6:6-7)

* I thu hi ka ke atante hian khawnvar a ni a, Ka kawng atan eng a ni. (Sam 119:105)

               

*A hun ngaihtuah zawngin zirtirtu ni tawh hial awm in ni na a, Pathian thu bul ber A Aw B te chu zirtir in ngai leh ta a, chaw rum ni lova  hnute la ngai mi ang in lo nih tak hi. Hnute ring a piang chuan fel-na thu ah hian hriatna an nei si lo, nausen an nih a vangin. Chaw rum erawh chu puitling te tan a ni, chungte chuan an hman fo a vangin chhia leh tha fiah turin an hriat theihnate chu an sawi zawi tawh. ( Hebrai 5:12-14)

* Nausen piang tharte angin a thlarau lam hnute, engmah pawlh loh chu chak rawh u, chu miah chuan chhandamna tling khawpa in than len theih nan. (1 Petera 2:2)

c) Sual laka him nan.

* I chunga thil ka tihsual loh nan i thu chu ka thinlungah ka khawl khawm a.( Sam 119:11)

* Tleirawlin engtin nhe a awm dan a tihthianghlim theih ang? I thu ang zela a awm dan veng thain. (Sam 119:10)

* Ka ke pente hi I thu-ah ti nghet la; Sualna chungah thu neihtir suh ang che. (Sam 119:133)

* Ka thu pawm apiangte erawh chu him takin an awm ang a, Thil thalo hlau lo vin an awm hle hle ang. (Thufingte 1:33)

* Nimahsela thu ngaithlatute mai ni lovin zawmtute lo ni zawk rawh u, chutilochu mahni inbum in lo ni dah a nge.(Jakoba1:22)

 d) Hriselna leh dam nan.

* “LALPA I Pathian aw hi ngun taka i ngaihthlak a, a mit hmuh a tha a tih zawngte i tih a, a thu pekte i ngaihsan a, a thu ruat zawng zawng te i pawm chuan Aigupta mite chunga hri ka len tir tak angte kha i chungah reng reng ka len tir ve lovang; kei LALPA a tidam tu che ka nih hi,” a ti a.. (Exodus 15:26)

* A thu chu a tir chhuak a, anni chu a tidam thin a, An boralna tur atate chu a chhanhim thin.

(Sam 107:20)

               

                 e) Hmuingil nan .

* He dan bu hian i ka chu chhuahsan hlek suh se ; chu mi thu ziak zawng zawng chu i zawm tlat theih nan chhun leh zan i ngaihtuah zawk tur a ni :  ti chuan i kawngte chu i lo titluang zel ang a, i lo hmuingil zel dawn nia. ( Josua 1:8)

* Mi suaksualte remruat anga awm ngai lo va, Mi sualte kawng pawha ding ngai lo va, Hmusit tute thutphah pawha thu ngailo mi chu, a eng a thawl e. A lawmmna chu LALPA danah a ni zawk a; A dan thu chu a chhun a zan in a ngaihtuah thin. Ani chu tuiluang kianga thing phun , A hun te a rah thin, A hnah pawh uai ngailo ang hi a ni a; A thiltih a piang chu a hmuingil zel ang. (Sam 1:1-3)

* Ani erawh chuan, “A ni, nimahsela Pathian thu hriaa zawmte hi mi hamtha an ni zawk e,” a ti a.(Luka 11 :28)

f) Thianghlim nan.

* I thu hi a thianghlim em em a ni ; Chuvangin i chhiahhlawh hian a ngaina a ni. (Sam 119:140)

* In hnena ka thusawi avang chuan tunah pawh in thianghlim tawh pang a ni. (Johana 15:3)

               

* Anni chu thutakin tithianghlim rawh, i thu chu chu thutak a ni. (Johana 17:17)

               

g) Thlemna hneh nan.

* Nimahsela ani chuan, “Mihring hi chhang chauhvin an nung lo vang a, Pathian kaa thu tin chhuakin an nung zawk ang, tih ziak a ni,” a ti a. (Mathaia 4:4 / Deuteronomy 8:3)

* I chunga thil ka tihsual loh nan I thu  chu ka thinlungah ka khawl khawm a. (Sam 119:11)

                * Chutichuan, mi sawi chhetu chhanna tur ka nei ang ; I thu ka ring si a. (Sam 119:42)

                h) Harhna atan.

* Nasa taka tihhrehawmin ka awm a : Aw LALPA i thu ang zelin mi tiharh ang che. (Sam 119:107)

* Ka nunna hi vaivutah a bet tlat a : I thu ang zelin mi tiharh ang che. (Sam 119:25)

                * Chu chu ka hrehawmnaah pawh ka thlamuanna a ni : I thu chuan mi tiharh ta si a. (Sam 119:50)

               

*I thute chu tihlan a ni a, ka ei a,I thute chu ka tan lawmna leh ka thilnlung hlimnaa ni; Aw LALPA, Sipaihote Pathian, i hming kan pu ta si a. (Jeremia 15:16)

               

Pathian Thu thiltihtheihna

*A thu chu a tir chhuak a, anni chu a tidam thin a, An boralna tur atate chu a chhandam thin. (Sam 107 :20)

* I thu hriattirte chu amak a ni ; Chuvangin ka nunna hian a vawng tha thin.i thu hrilhfiah hian mite a ti eng a ; Mi mawlte chu a hriat thiamtir thin. (Sam 119:129-130)

*  LALPA lehkhabuah zawng ula, chhiar rawh u:  chung zingah chuan pakhat mah kim lo a awm lo vang a, pakhat mah kawppui nei lo a awm lo vang: ka ka ngeiin thu a pe a, ka thlarau ngeiin chung chu a hruai khawm ta hlawm si a.( Isaia 34:16)

*Hlobet chu a vuai a, a par chu a chuai thin: kan Pathian thu erawh chu chatuanin a awm reng ang,’ tiin,” a ti a. (Isaia 40:8)

*Chutiang bawkin ka ka atanga ka thu chhuak chu a awm ang: engmah tih neilovin ka hnenah a kir leh lo vang a, ka duh ang chu a ti zo zawk ang a……(Isaia 55:11)

*Ka thu chu mei ang, tuboh lung chhutsawmna ang a nilo vem ni ? tih hi LALPA thu chhuak ani.(Jeremia23:29)

*Chuvangin an hnenah chuan, Lalpa PATHIAN chuan heti hian a ti a ni : “ Ka thu engmah hi khek a ni lo vang a, ka thu sawi a piang chu hlenin a awm zel zawk ang,” tih hi Lalpa PATHIAN thu chhuak a ni tiin hrilh rawh,” a ti a.(Ezekiela 12:28)

*Lei leh van a ral anga, ka thu erawh chu a ral lo vang. (Mat 24:35)

* Pathian thu chhuak reng reng  thil tithei lovin a awm lovang,” a ti a.(Luka 1:37)

* Tupawh keimah leh ka thu zah pui a piang, Mihring Fapa hian ama ropuina nen, a Pa ropuina nen, a vantirhkoh thianghlimte ropuina nen a lo kal hunah chuan chu mi chu a rawn zah pui ang.(Luka 9:26)

* Pathian Lehkha Thu zawng zawng hi Pathian thawk khuma pek ani a, zirtir kawngah te, thiam loh chantir kawngah te, felna zirtir kawngah te a sawt bawk ani. ( 2 Tim 3:16)

2.

PATHIAN :

Pathian chu Pa a ni.

* “ ‘Lalpa, Lalpa’ mi ti nazawng chu van ramah an lut lo vang a; ka Pa vana mi duhzawng titu erawh chu an lut ang. (Matthaia 7:21)

* “Abba! (Ka pa!) engkim i ti thei a; he no hi ka hnen ata la sawn rawh; nimahsela keia thu ni lovin nangma thu thu ni zawk rawh se,” a ti a. (Marka 14:36)

* “Pa in mi hmangaih ang bawkin kei pawhin ka hmangaih che u hi ; ka hmangaihin awm reng rawh u….” (Johana 15:9)

* An zaa pumkhat an nihna turin; ka Pa, nang keimaha i awm leh, kei nangmaha ka awm ang bawk hian, anni pawh keimahnia an awmna turin; nangin kei mi tir tih khawvelin an awih theihna turin. (Johana 17:21)

* Keini tan erawh chuan Pathian pakhat chauh (Pa chu) a awm a, ama hnen atangin engkim a chhuak a, keini pawh ama tana awm kan ni ; (1Korinth 8:6a)

               

* Engkim Pathian leh Pa pakhat chauh a awm a ; ani chu engkim chungah a awm a, engkim fang chhuakin a awm a, engkim chungah a awm bawk a ni. (Ephesi 4:6)

Mihringte hnena  PATHIAN  inpuanna -

* Kan thil tihsual lak ata min chhandam.

- Fapa a hring a nga, a hmingah ISUA i sa ang ; ani chuan a mite an thil tihsual lakah a chhandam dawn si a, “ a ti a. ( Mathaia 1:21)

* Diabola hnathawhte a tiboral.

- Thil tisualtu chu diabolaa chhuak a ni ; diabola chuan atir ata thil a tisual si a. Pathian Fapa lo lan chhan ber chu diabola hnathawhte a tihboral theih nan a ni. (1 Johana 1:8)

                *  Manganna ata min chhanchhuak.      

- Ka  manganin LALPA chu ka ko thin a, Ka Pathian ka au thin. Ani chuan a biak in atang chuan ka aw a hria a, A hmaa ka au thawm chu a bengah a lut ta a. (Sam 18:6)

- Ka koh hun che ngei chuan mi dotute chu an tlanchhia ang ; Hei hi ka hria Pathianin min tan hi. Pathianah chuan a thu ka fak ang a; LALPA-ah chuan a thu ka fak ang. Pathian ka ring a ka hlau lo vang; Mihringin enge mi tih theih ang. (Sam56:9-11)

               

-  Nova     -   Pathian hremna lak ata an him nan – Genesis 6:1 – 9 : 17

                    Abrama -   Milem biakna lak ata a fihlim nan – Genesis12:1 – 22:19  

                    Mosia    -   Aigupta bawih ata chhanchhuaha an awm nan Exodus 3 – 14

                 

* Hmabaka thil thalo thleng tur a hrilh lawk.

- Dik takin Lalpa PATHIAN chuan a rawngbawltu, a zawlneite hnenah a thuruk hrilh lovin engmah a ti lo vang.

(Amosa 3:7)

Kawng hrang hranga Pathian inpuanna hmanruate.

a) Isua Krista ah ( Isua Krista hi Pathian inpuanna vawrtawp a ni)

* Kei Paa ka awm leh  Pa keimahah a awm tih i awih lo vem ni ? In hnena thu ka sawi hi keima phuahchawpin ka sawi lo; Pa keimahah a awm reng a, a thil a ti zawk thin a ni. (Johana 14:10)

> Kei leh Pa chu pumkhat kan ni,” tiin a chhang a.( Johana 10:30)

> Isuan a hnenah, “Philip, hei leh chen hi in hnenah ka awm a, chuti pawhin mi hre lo maw? Tupawh mi hmu chu Pa hmu a ni. ‘ Pa chu keini min hmuhtir rawh,’ eng ti tiha i ti nge ni? (Johana 14:9)

b) Thilmak.

> Hnimbuk alh – Pathian tlang, Horeb chu a va thleng a. Tin, hnim bukah LALPA vantirhkoh, meialhin a hnenah a rawn inlar a : tin, a han en a, tin, ngaiteh, hnim buk chu meiin a kang a, a hnim buka erawh chu a kang ral si lo. (Exodus 3:1-2)

> Mosia tiang hmang leh Aigupta chunga thilmak ( hremna) thleng

                 (Exodus 4 – 12)

> Tuipui sen kan.

-  Tin, Mosian tuipui chungah  a kut a han phar a : tin, LALPAN zankhuain khawchhak

hli na takin a rawn tlehtir a, tuipui chu a nem kirtir a, tin, tuite chu a lo inthen ta a. (Exodus 14:21)

               

> Jordan lui kan

Chhak lam atanga tui lo luang thla lai chu a ding ta a, hla feah Zarethan ram bula Adam khuaah chuan a lo inhlawm ding ta luah a : tin, Araba tuifinriat, Tuifinrial Al lama luang chhuk lai chu a chat ta hlauh va : tichuan mipuite chu Jeriko khaw zawn takah chuan an kai ta a. (Josua 3:16)

> Elija

- Elija hmanga a sawi LALPA thu ang khan chhangphut bel chu a ruak chuang lo va, sahriak um pawh a kang hek lo. (1Lalte 17:16)

- Tin, LALPAN,  Elija thu chu a lo ngaihthlaksak a; tichuan naupang nunna chu amahah chuan a lo awm leh a, a lo harh leh ta a. (Lalte  17:22)

- Tichuan LALPA mei chu a lo tla a, halral thilhlan te, thing te, lung te, vaivut te chu a kang ral a, laih khuara tui chu a hip kang ta vek a. Tin, mipuiho zawng zawngin chu chu an han hmuh chuan an bawk khup a, “ LALPA hi a lo ni. Pathian chu,” an ti a. (1 Lalte 18;38-39)

- Tin, Elijan a chhang a, an hnenah, “Pathian mi ka nih zet chuan van ata mei lo tlathla se la, nangmah leh I hote sawmnga kha rawn kangral vek che u rawh se,” a ti a. Tichuan Pathian mei chu van ata a lo tla a, amah leh a hote sawmnga chu an kangral ta vek a. (2 Lalte 1 :12)

- Thilmak zawng zawng hi Pathian atanga chhuak ani vek lo va, thilmak thenkhat chu Setana atanga chhuak a ni.

- In zingah zawlnei emaw, mang neitu emaw an lo awm a, chhinchhiahna emaw, thilmak emaw an entir che u a, chhinchhiahna emaw thilmak emaw an entir che u a lo thlen a, in hriat ngai loh, ‘ Pathian dang I zui ang u khai, an rawng I bawl ang u,’ in hnena an tih chuan, chu zawlnei emaw, mang neitu emaw thute chu in pawm tur a ni lo; LALPA in Pathian chuan in thinlung zawng zawng leh in nunna zawng zawngin LALPA in Pathian in hmangaih nge hmangaih lo tih hriat nan a fiah che u a ni e. (Deuteronomy 13:1-3)

- Leia awmte hnenah Sakawlh, khandaiha hliam hnu la dama chawimawi nan amah lem an siam tur ani tih sawiin, Sakawlh mithmuha thilmak ti tura thu a hmuh, chung thilmak avang chuan leia awmte chu a bum bawk a.( Thupuan 13:14)

- Chung chu ramhuai thlarau, thilmak ti thinte an ni; anni chu Pathian Engkimtitheia ni ropuia indonaa hruai khawm turin khawvel zawng zawnga lalte hnenah an kal a. (Thupuan 16:14)

- Tin, sakawlh chu an man a, zawlnei der-sakawlh chhinchhiahna nei leh a lem chubai buktute a bumthinna thilmak a mithmuha titu kha- an man tel a; an pahnih chuan kata kang mei dilah chuan a nung chungin an paih a. (Thupuan 19:20)

               

                c) Mumang leh Inlarna

                * Mumang leh inlarna hmangin thlmuanna, a rorelna leh a remruatna a hriattir thin.

-Chung thil hnuah chuan, “Abram, hlau suh, kei hi I phaw leh I lawman nasa tak mai ka ni asin,” tiin LALPA thu chu Abrama hnenah mumang angina a lo thleng a. (Genesis 15:1)

- Nimahsela Pathian chu zanah a mumangah Abimeleka hnenah alo kal a, a hnenah, “Ngaiteh, i hmeichhe hruai avang hian mitthi mai i ni ta ; mi nupui a ni si a,” a ti a. (Genesis 20:3)

- Tin, an hawn hnuin ngaiteh, Lalpa vantirhkoh Josefa hnenah a inlar a, “ Tho la, naute leh a nu hruai la, Aigupta ramah tlan bo rawh, ka hrilh leh hma loh che zawng chutah chuan zawm reng; Herodan naute tiboral turin a zawng dawn a ni,” a ti a. (Mathaia 2:13)

- Tin, zanah Lalpan Paula hnenah chuan mumang angin, “ Hlau suh la ngawi lovin thu sawi zel rawh; kei i hnenah ka awm alawm, tina tur chein tuman i chungah kut an thlak lo vang; he khuaah hian mi tam tak ka nei si a,” a ti a. (Tirhkohte 18:9)

               

d)Thilsiam.

- Vante khian Pathian ropuizia chu a hriattir a; Boruak zau tak khian a kut chhuak chu a lantir thin a. (Sam 19:1)

e) Sik leh sa.

- Nimahsela amah hriattirna awm lovin a insiam lo, chutin thil a titha thin a, van ata ruahte leh kum that kumte a pe che u a, in rilru ei tur leh lawmnain a tihkhah thin che u kha,” an ti a. (Tirhkohte 14:17)

f)Mihring ruangam.

- Tin, Jakoba chuan chu mi hmun hmingah chuan Peniel a vuah ta a : “Pathian chu a hmai hma ngeiah ka hmu a, ka nunna hi zuah a ni si,” a ti a ni. (Genesis 32:30)

               

g) A Thutak hmangin

- A tirin Thu a awm, Thu chu Pathian hnenah a awm, Thu chu Pathian a ni. Chu mi chu atirin Pathian hnenah a awm. ( Johana 1:1-2)

               

h) Zawlneite.

- Tun hma hun zawng khan kawng tinrengin Pathian chuan kan pi pute hnenah zawlneite hmangin thu a sawi thin a. Tun hun hnuhnungah hian kan hnenah Fapain thu a rawn sawi ta thung a ni ; (Hebrai 1:1-2a)

               

3.                                                                             PATHIAN HMING LEH NIHNATE :

Pathian hming leh a awmzia -

JEHOVA (AWMA) – Tin, Pathianin Mosia hnenah, “AWMA KA NI,” a ti a; tin, a hnenah chuan, “Nangin Israela thlahte hnenah chuan, ‘AWMA chuan in hnenah mi rawn tir a ni e,’ I ti tur a ni,” a ti a. (Exodus 3:14)

- Jehova-Jire (LALPA in tum chawp thin) -Tichuan Abrahaman chu mi hmun hmingah chuan Jehova-jire a vuah a: vawiin thlenga,” LALPA tlangah ngaihtuah a ni ang chu,” an ti thin ang hian.(Genesis 22:14)

                

                 -  Jehova-Rapha ( LALPA ti dam tu) -  “… kei LALPA a tidam tu che ka nih hi,” a ti a.(Genesis 15:26)

- Jehova-nissi (LALPA kan hnehna puan zar)-Tin, Mosian maicham a siam a, a hmingah chuan Jehova-nissi a vuah a(Genesis 17:15)

-   Jehova-Salom(LALPA kan thlamuanna)- Tin, LALPAN a hnenah, “ Thlamuang takin awm la hlau suh: I thi lo vang “ a ti a. Chutichuan Gideonan chutah chuan LALPA tan maicham a siam a, Jehova-salom a vuah a: (Roreltute 6:23f)

- Jehova-Ra-ah(LALPA min vengtu)- LALPA chu mi vengtu a ni a: ka tlachham lo vang.(Sam 23:1)

- Jehova-Tsidkenu(LALPA kan felna)- A hun chhungin Juda chu chhandam a ni ang a,Israel chu him takin a awm ang. Tin, hei hi a hming an la vuah tur chu a ni,’LALPA chu kan felna a ni’ tih hi.(Jeremia 23:6)

- Jehova-Sabaoth(Sipaihote LALPA)- Sipaihote LALPA  chu kan hnenah a awm a; Jakoba Pathian chu kan kulhbing sang a ni.(Sam46:7)

- Jehova-nissi (Pathian kan puanzar) - Tin, Mosian maicham a siam a, a hmingah chuan Jehova-nissi a vuah a: (Exodus 17:15)

- Jehova-Yashaa Gaal (Pathian chhandamtu leh tlantu) - Tin, nangmah hnenchhaihtute chu anmahni sa ka eitir ang a; uain thlum rui ang hian anmahni thisenin an rui ang: tichuan mi zawng zawngin, kei LALPA hi nangmah chhandamtu leh nangmah tlantu, Jakob-ho Mi Chaka chu ka ni tih, an hria ang,'" tiin. (Isaia 49:26)

- Jehova-Mkadish Kem (LALPA tithianghlimtu) - Tin, LALPAN Mosian hnenah, “Israela thlahte hnenah chuan, ‘Ka chawlhnite hi in serh ngei ngei tur a ni; in thlahte thlenga keimah leh nangmahni inkara chhinchhiahna a ni si a; kei hi LALPA nangmahni tithianghlimtu che u ka ni tih in hriat theih nan.( Exodus 31:12,13)

- Jehovah-Zeboath (Sipai hote LALPA) - Sipaihote LALPA chuan tihboral bang tlemte min lo zuahsak suh sela chuan, Sodom ang khan kan awm daih tawh ang a, Gomorra ang mai khan kan awm tawh ang. (Isaia 1:9)

- El Elyon (Pathian Chungnungbera)- Tin, a ni chuan Abrama chu mal a sawm a, “ Lei leh van neitu Pathian Chungnungbera chuan Abrama mal sawm rawh se. I hmelmate i kuta petu, Pathian Chungnungbera chu fakin awm bawk rawh se,” a ti a.(Genesis14:19f)

- Thu tlu hi vengtute thuipeka tih a ni a, thil phut hi mithianghlimte thua tih a ni a, chungnungbera chuan mihringte lalna ram chungah thu a nei a, a duhsak apiang a pe a, mi hnuaihnung berte pawh a luahtir thin a ni tih minungin an hriat nan a ni;’ tiin a au va. (Daniela 4:17)

- El Shaddai (Pathian Engkimtitheia)- Tin, Abrama chu kum 99 mi a nihin, LALPA chu Abrama hnenah chuana rawn inlar a, a hnenah,”Kei, Pathian Engkimtitheia ka ni; ka hmaah awm la, tha famkimin awm rawh, Ti chuan nangmah nena kan inkarah thu ka thlung ang a, nasa takin ka tipung ang che,” a ti a.(Genesis17:1-2) (Pathian engkimtithei nimahse engkim a ti kher lo)

- El Olam (Chatuan Pathian)- Tin, Abrahama chuan Beer-seba-ah chuan far thing a phun a, chutah chuan LALPA, Chatuana Pathian hming chu a lam a.(Genesis 21:33)

- El Gibor (Pathian Chaka)- Kan tan naupang a lo piang a, fapa pek in kan lo awm ta a; rorelna chu a koki ah a chuang a nga; a hmingah chuan Maka, Remruattua,Pathian Chaka, Chatuan Pa, Remna Lal an ti dawn si a.(Isaia 9:6)

 - Elohim (Siamtu Pathian) - Tin, Pathianin, “Kan anpuiin, keimahni ang takin mihring siam ila, anni chu tuifinriata sangha chungah te, chungleng sava chungah te, ran chungah te, lei chung zawng zawngah te, rannung leia bawkvaka kal zawng zawng chungah te thu i neihtir ang u,” a ti a. (Genesis 1:26)

-Thikthuchiaa - “ Pathian dang reng reng chu i be tur a ni si lo va : LALPA chu a hming reng pawh Thikthuchhiaa a ni a, Pathian thikthuchhia a ni si a. (Exodus 34:14)    

Pathian chu Dan petu leh  Roreltu a ni –

* “ LALPA chu, LALPA chu, Pathian lainat naa khat, mi khawngaih thei tak, thin nel tak, ngilneihna leh thu tak ngah, mi sang tam tak chunga khawngaihna lantir thin, khawlohna te, bawhchhiatna te, suahsualna te, ngaidam thin ; thiam lova ruatte chhuah mai ngai lo ; Pate khawlohna avanga fate, fate fa lehte, chuan thumna leh chuan li na thleng pawha hrem thin chu” (Exodus 34:6-7)

* Mi sualte chunga lungnihlohna nei – Pathian chu roreltu fel tak a ni, A ni, ni tin misualte chunga lungnihlohna nei Pathian a ni. (Sam 7:11)

* Amah Pathian ngei chu roreltu a ni si a. (Sam 50:6)

* LALPA chu kan roreltu a ni a, LALPA chu dan min petu a ni a, LALPA chu kan lal a ni ; ani chuan min chhandam ang. (Isaia 33:22)

* Ani chu mitthite leh mi nungte chunga Roreltua Pathian ruat chu a ni tih, mi hnena tlangaupui leh hriattir turin Pathianin thu min pe a ni. (Tirhkohte 10:42)

* Chhandam theia tiboral thei a ni – Dan petu leh roreltu pakhat chauh a awm, chhandam theia tiboral theia chu ; nang thenawmte sawiseltu chu tunge maw i nih le? (Jakoba 4:12)

Pathian zia -

*  Thatna Pathian - 

- Tin, ani chun a hnenah, “Thil tha thu engah nge mi zawh?” Tha chu pakhat chauh a awm; engpawh ni sela, nunnaa luh i duh chuan thupekte chu zawm rawh,” a ti a. (Matthaia 19:17)

- Chutichuan Pathian thatzia leh a tihbaizia chu ngaihtuah rawh; a tlute tan chuan a tihbai a ni; nang atan erawh chuan a tha a ni, a thatnaa i awm reng chuan; chutilochuan nang pawh sah thlakin i awm ve ang. (Rom 11:22)

* Pathian thianghlim -

- “Israela thlah, mipuiho zawng zawng chu bia la, an hnenah, ‘In thianghlim tur a ni: Kei, LALPA in Pathian hi ka thianghlim si a. (Leviticus 19:2)

- LALPA anga thianghlim hi an awm lo; Nangma ang reng an awm si lo, Kan Pathian ang lungpui reng a awm hek lo.( I Samuela 2:2)

- Chutichuan, in Pa vana mi a tha famkim angin in tha famkim tur a ni. (Matthaia 5:48)

- Tin, Thilnung pali chu thla paruk theuh nei, an vel leh an chhunga mita khat an ni.Tin,“Lalpa Pathian, Engkimtitheia, Awm tawha leh awm meka leh lo awm tura chu,A thianghlim e, a thianghlim e, a thianghlim e,” tiin chhun leh zan an chawl ngai lo. (Thu Puan 4:8)

* Dikna Pathian -

- LALPA chu mi khawngaih thei tak leh fel tak ani a; A ni, kan Pathian chu mi lainat thei tak a ni. (Sam 116:5)

 - Aw LALPA, nang chu i fel a,  I rorelte pawh a dik a ni. (Sam 119:137)

- Sualna a hua - Felna chu i ngaina a, Bawhchhiatna chu i huat kha; Chuvangin, Pathian, i Pathian chuan, I thiante ai chuan Hlimna hriak a thih nasat tak che hi,” tih leh, (Hebrai 1:9)

- A rorelnate chu a dikin a fel a ni; ani chuan nawhchizuar ropui tak, a mi ngaih chin vanga lei tikhawlotu chu ro a rel a, a bawihte thisen chhuak phuba chu a kuta a lak tak hi,” a tih ka hria a. (Thu Puan 19:2)

* Hmangaihna leh khawngaihna Pathian -

- Aw LALPA, mi chhang ang che; i ngilneihna chu a tha si a: I lainatna nasatzia ang zelin ka lam hi lo hawi ang che. (Sam 69:16)

- Khawvel a hmangaih - Pathianin khawvel a hmangaih em em a, chutichuan a Fapa mal neih chhun a pe a, amah  chu tupawh a ring apiang an boral loh va, chatuana nunna an neih zawk nan. (Johana 3:16)

- Pathian hmangaihna ata engmahin min then thei lo - Thihna te, nunna te, vantirhkoh te, lalna te, thil awm sa te, thil lo la awm tur te, thiltihtheihna te, sanna te, thukna te, thil siam dang reng rengte pawhin, kan Lalpa Krista Isuaa awm Pathian hmangaihna ata chu mi then thei lovang tih dik takin ka hre si a. (Rom 8:38,39)

- Hmangiahna - Hmangaihnain a dawhthei a, ngil a nei bawk thin; hmangaihnain a itsik lo va; hmangaihna a infak lo va, a uang lo va,  a che mawi lo lo va, mahni hma a sial lo va, a thinur duh lo va, sual lamah a ngaihtuah lo va; fel lohnaah a lawm lo va, thutak erawh chu a lawmpui thin a; engkim a tuar hram hram a, engkim a ring a, engkim a beisei a, engkim a tuar chhuak thin. (I Korinth 13:4-7)

-  Khawngaihna - Chutiang bawkin nangni tleirawl deuhte u, upa hnenahte intulut rawh u. A ni, in zain rawng inbawl tawn theuh turin thuhnuairawlhnain inthuam rawh u; Pathianin chapote a dodal a, inngaitlawmte erawh chu khawngaihna a pe si thin.( I Petera 5:5)

- Hmangaihna Pathian - Hmangaihna nei lo chuan Pathian a hre lo; Pathian chu hmangaihna a ni si a.( I Johana 4:8)

-  Hmangaihnaah chuan hlauhna reng a awm lo- hmangaihna famkimin hlauhna a hnawt chhuak zawk thin a ni, hlauhnaah chuan hremna a awm si a; a hlautu chu hmangaihnaah a la famkim lo a ni. (I Johana 4:18)

* Rinawmna Pathian -

- Aw LALPA, nang chu ka Pathian i ni a; ka chawimawi ang chia, i hming ka fak ang; thil mak tak, hmasanga remruatte chu, rinawm tak leh thutakin i ti si a. (Isaia 25:1)

- Mihring tuar theih ang chauh lo chu thlemna reng reng in chungah a thleng ngai lo. Pathian zawng a rinawm a ni, ani chuan in tuar theih tawk aliam chu thlemna in tawh a phal lo vang; in tuar theihna turin thlemna rualin tlan chhuahna kawng a siam nghal zawk ang. (I Korinth 10:13)

- A kotu che u chu a rinawm a, tih pawh a ti bawk ang. (I Thessalonika 5:24)

- “Tin, Laodikei khuaa kohhranho tirhkoh hnenah chuan heti hian ziak rawh: ‘Amena, thu hretu rinawm leh dik taka, Pathian thil siam bula khan heng thu hi a sawi a ni; (Thu Puan 3:14)

- Tin, van inhawng ka hmu a; tin, ngai teh, sakawr var leh a chunga chuang, Rinawma leh Diktaka an tih chu ka hmu bawk a; ani chuan fel takin ro a rel a, mi a do thin. (Thu Puan 19:11)

* Engkim petu Pathian -

- Sum leh pai - Tuna a ngheh anga in pi leh pute hnena chhechhama thu thlun chu a tihnghehna turin LALPA in Pathian chu hre reng rawh u, sum leh pai deh chhuah theihnapetu che u chu amah chu a ni zawk asin. (Deuteronomy 8:18)

- Eitur - Ani chuan tisa zawng zawng hnenah ei tur a pe thin a: A ngilneihna pawh kumkhuain a awm dawn si a. (Sam 136:25)

- Finna - Aw ka thlahtute pathian, finna leh theihna min petu, i lak ata ak thil dil tuna min hriattir tu chu. Lawmthu ka hrilhin ka fak a che: Lal thil chu min hriattir tawh si a,’’ tiin a sawi a. (Daniela 2:23)

> In zingah tupawhin finna a tlakchham chuan mi zawng zawng hnena hau lo leh ui lova pe thintu Pathian chu dil rawh se, chutichuan a hnenah pek a ni ang. (Jakoba 1:5)

- Mamawh tinreng - A ram leh a felna chu zawng hmasa zawk rawh u, tichuan chung zawng zawng chu a pek belhchhah dawn che u nia. (Matthaia 6:33)

- Chawlhna - "Nangni thawk rim leh phurrit phur zawng zawngte u, ka hnenah lo kal ula, keiman ka chawlhtir ang che u. (Matthaia 11:28)

- Fapa mal neihchhun - Pathianin khawvel a hmangaih em em a, chutichuan a Fapa mal neih chhun a pe a, amah  chu tupawh a ring apiang an boral loh va, chatuana nunna an neih zawk nan. (Johana 3:16)

- Thlarau Thianghlim -  Tin, Thlarau Thianghlim kan hnena min pek khan Pathian hmangaihna chu kan thinlunga a leih tawh avangin beiseina chuan a timualpho lo va. (Rom 5:5)

- Chatuan nunna - Sual man chu thihna a ni si a; Pathian thilthlawnpek erawh chu, kan Lalpa Krista Isua zarah chuan, chatuana nunna a ni. (Rom 6:23)

- Hnehna - Nimahsela kan Lalpa Isua Krista zara hnehna min petu Pathian hnenah chuan lawmthu awm rawh se. (I Korinth 15:57)

- Simna - Do tura insiamte chu thuhnuairawlh takin a zirtir zawk tur a ni; chutichuan Pathianin thutak chu an hriat famkim nan a simtir hlauhvin, Pathian duhzawng ti atan Lalpa bawihin a manin, Diabola thang ata an chhuak thei mahna. (II Timothea 2:25-26)

- Lehkha Thu - Pathian Lehkha Thu zawng zawng hi Pathian thawk khuma pek a ni a, zirtir kawngah te, thiam loh chantir kawngah te, zilh kawngah te, felna zirtir kawngah te a sawt bawk a ni; (II Timothea 3:16)

Pathian ze ropui –

* Chungnung ber –

- I  hmelmate i kuta petu, Pathian Chungnungbera chu fakin awm bawk rawh se," a ti a. Tin, Abrama chuan ani chu engkim chu sawma pakhat a pe a. (Genesis 14:20)

- LALPA chu vanah khian alo ri dur dur a, Chungnungbera chuan a aw a chhuah a. (II Samuela 22:14)

- Nangmahah chuan ka lawmin ka hlim ang a: Aw, nang Chungnungber, i hming fakin ka zai ang. (Sam 9:2)

- Lui pakhat a awm a, chu mi pengte chuan Pathian khawpui chu a tilawm thin. Chungnungbera awmna hmun thianghlim chu. (Sam 46:4)

- LALPA Chungnungbera chu a hlauhawm si a; Lei chung zawng zawnga Lal ropui ak a ni. (Sam 47:2)

- Pathian Chungnungbera chu ka au vang; Pathian engkim mi tihsaktu chu. (Sam 57:2)

- Ka ngaihtuahte hi i ngaihtuahte a ni si lo va, i awm dante chu ka awm dan a ni hek lo, LALPAN a ti. )Isaia 55:8)

- Van khi lei aia a sang zawk angin, ka awm dante hi in awm dante aiin a sang zawk si a, ka ngaihtuahte pawh hi in ngaihtuahte aiin a sang zawk bawk a ni.( Isaia 55:9)

* Engkim hria(finnaa klhat) -

- Chuti taka chapovin thu sawi tawh suh ula: In ka atangin tawng chaltlai reng reng chhuak suh se:LALPA chu finna Pathian a ni si a, Amain thiltihte a buk fel thin. (I Samuela 2:3)

- Pathian finna leh hriatna ngahzia chu a va thuk em! A rorelnate chu hriat theih rual leh, a kawngte chu chhui theih rual a va ni lo em! (Rom 11:33)

- Pathian finga chauh hnenah chuan Isua Krista avangin chatuana ropuina awm rawh se. Amen. (Rom 16:27)

- Thil siam ama mithmuha lang lo reng reng a awm lo; kan chanchin kan thlenna tura mithmuhah chuan engkim saruak leh inhawng sain a awm zawk a ni. (Hebrai 4:13)

- Chung lam atanga finna lo chhuak erawh chu atirin a thianghlim phawt a, chu mi hnuah chuan inrem a duh a, a nunnem a, a tihnuam a, khawngaihna leh rah thain a khat a, thlei bik a nei lo va, a vervek lo a ni. (Jakoba 3:17)

- Chu miah chuan thutaka mi kan ni tih kan inhria ang a, kan rilruin thiam loh min chantirna kawngah chuan ama mithmuh ngeiah kan rilru kan thlem dai bawk ang; Pathian chu kan rilru aiin a ropui zawk a, engkim a hre si a. (I Johana 3:19,20)

* Khawikipa  awm -

-  Tichuan inbiakna puan in chu chhumin a rawn tuam ta mup a, biak buk chu LALPA ropuinain a lo khat ta a. (Exodus 40:34)

- Vanah han lawn ila, chutah chuan i awm si a: Seol-ah mutna siam ila, ngai teh, chutah chuan i awm bawk si a. (Sam 139:8)

- Mi chungnung, chawisan, chatuana awm, a hming Thianghlima chuan heti hian a ti si a: "Kei hmun chungnung leh thianghlimah ka awm a, mi thuhnuairawlhte rilru tiharh tur leh inchhir ngawih ngawihte thinlung tiharh turin mi rilrua inchhir ngawih ngawiha thuhnuairawlh tak hnenah pawh ka awm a ni. (Isaia 57:15)

- Hla taka awm Pathian ni lovin, Hnaitea awm Pathian em ni ka nih? Tih hi LALPA thu chhuak a ni. (Jeremia 23:23)

- Hmun biruah ka hmuh theih loh tura boru thei an awm dawn em ni? Tih hi LALPA thu chhuak a ni. Lei leh vanah hian ka khat a ni lawm ni? Tih hi llapa thu chhuak a ni. (Jeremia 23:24)

- Tin, thil engkim a ke hnuaiah a dah a, amah chu engkim zawng zawng chungah lu atan kohhranho hnenah chuan a pe a, (Ephesi 1:22)

* Engkimtithei -

- Atirin Pathianin lei leh van a siam a. (Genesis 1:1) 

- Thinlunga fing, chaknaa engkimtithei, A laka inchhungawng tunge hmuingil? (Joba 9:4)

-   "Aw LALPA pathian, ngai rawh, i thiltihtheihna nasa leh i kut pharin lei leh van i siam ta a; i tan thiltih harsa lutuk a awm reng reng lo va: (Jeremia 32:17)

- "Ngai rawh , kei LALPA hi tisa nei zawng zawngte Pathian ka ni a, ka tan harsa lutuk a awm em  ni?" tiin. (Jeremia 32:27)

- Tin, ani hi chu engkim awm hmain a awm reng a ni, amahah chuan engkim a ding ho bawk a ni. (Kolossa 1:17)

- “Kei Alpha leh Omega ka ni,” Lalpa Pathian, awm meka leh awm tawha leh lo la awm tura, Engkimtitheia chuan a ti a ni. (Thu Puan 1:8)

* Chatuan mi -

- Abrahama hnenah te, Isaaka hnenah te leh Jakoba hnenah te khan Pathian Engkimtitheiain ka lo inlar ta a, ka hming JEHOVA-in erawh chuan an hnenah ka la inhriattir lo va. (Exodus 6:3)

- Mi hriata, mi rina, amah chu ka ni tih in hriat theihna turin, nangni hi mi rhiatpuitute in ni, ka chhiahhlawh ka thlana pawh chu, LALPAN a ti: ka awm hma chuan Pathian reng reng din an awm lo va, ka awm hnuah pawh an awm hek lo vang. (Isaia 43:10)

- Tin, Pathian Fapa chu a lo kal a, Mi Diktak chu hre thei turin hriat theihna min pe tih kan hre bawk a; tin, keini, a Fapa Isua Kristaa kan awm hian, Mi Diktakah chuan kan awm a ni. Ani chu Pathian dik tak a ni a, chatuana nunna pawh a ni. (1Johana 5:20)

- Tin, ka hnenah, “A lo thleng ta. Kei Alpha leh Omega, a Bul leh a Tawp ka ni. Tuihal apiang hnenah chuan Nunna Tuikhura mi athlawnin ka pe ang. (Thu Puan 21:6)

 * Danglam ngai lo -

- Nang erawh chu i pangngai fo va, I kumte chuan ral ni reng a nei lo vang. (Sam 102:27)

- Kei LALPA hi ka danglam si lo, chuvangin nangni, aw Jakoba fate u, tihboral in ni lo ve. (Malakia 3:6)

- Puan angin i zial bawk ang a – Silhfen ang maiin, Tichuan a lo danglam tawh ang; Nang erawh chu i pangngai fo va, i kumte pawh a ral lo vang,” tiin. (Hebrai 1:12)

- Isua Krista chu niminah nen, vawiinah nen, kumkhua pawhin a pangngaiin a awm fo vang. (Hebrai 13:8)

- Thilpek tha leh thilpek famkim zawng zawng chu chung lam atangin engte Pa hnen ata, a lo chhuk thin a ni, amahah chuan danglamna leh herna hlim reng reng a awm thei lo. (Jakoba 1:17)

Pathian Thutiam

* In kephaha in rah apiang chu in ta a ni ang a, thlaler atang leh Lebanon tlang atangin lui, Euphrates lui atang chuan thlang lam  tuifinriat thlengin in ram a ni ang. Tumah reng rengin an chelh lo vang che u ; (Deuteronomy 11:24)

* Tin, i hmahruaitu chu LALPA a ni anga, i hnenah a awmzel anga, a tithlawn lo vang chia, kal pawh a kal san tawp lo vang che, hlau suh la, zam hek suh,” a ti a.(Deuteronomy 31:8)

* Thu ka pe che a ni lawm ni? Chak tak leh huai takin awm rawh; hlausuh la, zam hek suh : LALPA i Pathian chu i kalna apiangah i hnenah a awm zel dawn alawm,” (Josua 1:9)

* Nimahsela nangni zawng chak takin awm ula, inthlahdah suh u, in thiltih man chu in hmu dawn a ni,” a ti a.(2 Chronicles 15:7)

* I awm dan tur chu LALPA chungah nghat la, Amah chu ring la, aman a ti vek ang.(Sam 37:5)

*Mittui tla chunga tuhte chuan hlim takin an at ang. Tap chungin buh chi feh chhuah pui mah sela, A buh phalte kengin hlim takin a lo haw le hang.(Sam 126:5-6)

* I kawng zawng zawngah  amah hre reng la, I kawngte chu a kawhhmuh zel ang che( Thufingte3:6)

* Bawhchhiatna zep tute chu an hmuingil lo vang a, Zep lova inpuanga hawisan tute chuan zahngaihna an hmu ang. (Thufingte 28:13)

* Zilhhau fo pawha a ring tikhawng tlat chu Vawilehkhatah tihtliahin a awm ang a, tihdamna a awm lo vang. (Thufingte 29:1)

*LALPA nghaktute chuan an chakna an siam tha le hang a; mupuite angina thlain an thlawk chho vang a, hah lovin an tlan ang a, chau lovin ke in an kal ang.(Isaia 40:31)

* Chumi ni ah chuan Juda hotute chu thing zinga meivam angina ka siam ang a, Buhphal zinga meichher angina ka siam ang: Tin, a vel a mipuite chu a kang fai ang – dinglam leh veilam ah ; Tin, Jerusalem chu ama hmun ngei, Jerusalem-ah chuan a ding le hang. (Zakaria 12:6)

*A ram leh a felna chu zawng hmasa zawk rawh u, tichuan chung zawng zawng chu a pek belhchhah dawn che u nia.(Mathaia 6:33)

*Nangni thawkrim leh phurrit phur zawng zawng te u, ka hnenah lo kal ula, keiman ka chawlhtir ang che u.(Mathaia 11:28)

*Chutichuan nangni misual mahin in fate thil tha pek nachang in hriat chuan, in Pa vana mi chuan a diltute chu Thlarau Thianghlim a v ape nasa dawn em !” a ti a.(Luka 11 :13)

*Tin, ani chuan an hnenah,” Tih tak meuhvin ka hrilh a che u, tu pawh Pathian ram avanga in emaw, nupui emaw, unaute emaw, nu leh pa emaw, fate emaw kalsan tawh phawt chu, tun dam chhung la la hian a aia tam zawk hmulo tur tumah an awm lo, hun lo la thleng tura chatuana nunna nen,” a ti a. (Luka 18:29-30)

*A kotu che u chu a rinawm a, tih pawh ati bawk ang.(1 Thessalonika 5:24)

* Ngai teh ka lo kal thuai dawn e, mi tin an thiltih ang zela pek tur in ka lawman ka hnenah a awm.(Thupuan 22:12)